ഒക്ടോബർ മാസം.... 🍁
നാട്ടിൽ മകരക്കാറ്റ് ചൂളമടിച്ചു കയറുന്ന, ഇലകൾ പൊഴിയുന്ന ശരത്കാലം..
നോർത്തമേരിക്കയുടെ... സ്വന്തം ഫാൾ അഥവാ Autumn 🍁
നാട്ടിലെ പോലെയല്ല.......
ഇവിടത്തെ പ്രകൃതിയെ ഏറ്റവും സുന്ദരിയാക്കുന്ന ഋതുക്കളിലൊന്നാണിത്.....
പുറത്ത് വീശിയടിക്കുന്ന നനുത്ത കാറ്റിൻ താളത്തിൽ തലയാട്ടുന്ന ഇടതൂർന്ന ഫിർ മരങ്ങളിലെ സൂചിത്തുമ്പിലകളിൽ നിന്ന് തൊട്ടെടുക്കാവുന്ന മഴത്തുള്ളിത്തണുപ്പ്....
നീണ്ടുനിവർന്നു കിടക്കുന്ന കാൽനടക്കാർക്കുള്ള വാക്കിംഗ് ട്രെയിലിൽ നിറയെ കാറ്റത്ത് പൊഴിഞ്ഞുവീണ മഞ്ഞയും ഓറഞ്ചും ചുവപ്പും കലർന്ന നക്ഷത്രാകൃതിയിലുള്ള മേപ്പിൾ ഇലകൾ......
ആകെ മൊത്തം.... ഷിഫോൺ സാരി.... ഷാരൂഖ് ഖാൻ.... ഇങ്ങനെ അല്ലറ ചില പ്രോപ്പർട്ടീസ് മാത്രം കുറവുള്ള ഒരു യാഷ് ജോഹർ.... ബോളിവുഡ് റൊമാന്റിക് കാലാവസ്ഥ! ❤️
Sirji.... What an alcoholic weather! 🤣
പഴയോർമ്മകളിലെ നോർത്ത് ഇന്ത്യൻ ....ഒക്ടോബറുകൾക്ക് കുറച്ചും കൂടി കടും ചായങ്ങളാണ്.
ദില്ലിയിൽ ദസ്ഹേര രാമലീല മൈതാനത്ത് ദശമിയിൽ ചാമ്പലാക്കുന്ന താൻപോരിമയുടെയും...... അഹങ്കാരത്തിന്റെയും... വാനോളം മുട്ടുന്ന രാവണനും...
മിനുമിനുങ്ങുന്ന കുപ്പായമിട്ട് താളത്തിൽ വട്ടമിട്ട്.... നൃത്തം ചെയ്യുന്ന ഗർബാരാത്രികളും .....
രാത്രികളിൽ കണ്ണുപൂട്ടാത്ത. ഉറങ്ങാൻ കൂട്ടാക്കാത്ത മഹാനഗരവും...
പണ്ട് നാട്ടിൽ പൂജവെപ്പിന്റെ സീസൺ ആയിരുന്നു ഒക്ടോബർ....
കോൺവെൻ്റ് സ്ക്കൂളിൽ കൂടെ പഠിക്കുന്ന ഹിന്ദു കുട്ടികൾക്ക് മാത്രം ഹോംവർക്ക് കൊടുക്കാത്ത.... ഏകപക്ഷീയമായ പൂജവെയ്പ് അവധിക്കാലം!
ഇന്ത്യൻ ഭരണഘടന അനുശാസിക്കുന്ന മതേതരത്വത്തിൽ അടിയുറച്ച് വിശ്വസിക്കുന്ന
നസ്രാണിയായാലും.... ഇങ്ങനെ ഒരു ആവശ്യത്തിന് "റൂട്ടടക്കം ബസ്സ് വിൽപ്പനയ്ക്ക്" എന്നുപറഞ്ഞതുപോലെ.... ബാഗടക്കം ഫുൾ സ്ഥാവരജംഗമ പാഠ്യ പാഠ്യേതര ...... കംപ്ലീറ്റ് കിറ്റ് പൂജവെക്കാൻ ഫുൾ സെറ്റായ ഞങ്ങളോട്
ന്താണാവോ അങ്ങനെയൊരു വിവേചന ടോക്ക്!
എനിവേയ്‌സ് .... പൂജവെപ്പിന്റെ തലേ ദിവസം അവധി ചോദിക്കാൻ ഹെഡ്മിസ്ട്രസിന്റെ റൂമിന്റെ മുന്നിൽ വരി നിൽക്കാൻ നോം മുമ്പിലുണ്ടാകും.... അത് വേറെ കാര്യം!!!!!
ആക്ച്വലി, അതിന്റെയൊരു ഗുട്ടൻസ് എന്താണെന്ന് വെച്ചാൽ....
തൃശ്ശൂർ–കുന്നംകുളം ഏരിയയിൽ നോയമ്പിന് മുന്നേ സർവ്വ പള്ളിപ്പെരുന്നാളുകളും നടക്കുന്ന മാസം കൂടിയാണ് ഒക്ടോബർ.
ടൈമിംഗ് കറക്റ്റ് ആയാൽ.... വാഴ നനയുന്നതിന്റെ കൂടെ ചീരയും എന്ന് പറഞ്ഞപോലെ....
ചെണ്ടപ്പുറത്ത് കോലിടുന്ന നേരത്ത്....
പന്ത്രണ്ടാന്തി പെരുന്നാളിന്റെ മൂന്ന് ആന സഹിതമുള്ള രണ്ട് ദിവസത്തെ ചെണ്ട, പാണ്ടിമേളം, ബാൻഡ് സെറ്റ്.... 24×7 അങ്ങാടി ചുറ്റിയുള്ള കൊട്ടിക്കേറ്റൽ,
രണ്ട് സെറ്റ് റീചാർജ് കഴിഞ്ഞാൽ ആനയെ വരെ ശാസിച്ചുനിർത്തുന്ന വയറാവു വറതപ്പേട്ടന്റെ ഹൈലൈറ്റ് സ്നേക്ക് ഡാൻസ് പെർഫോമൻസും കണ്ട് 😂😂
ഒരു ഫുൾ റൗണ്ട് അടിച്ച്, പഴഞ്ഞി, അടുപ്പുട്ടി, കാട്ടകാമ്പാൽ, ചിറളയം... പള്ളികളും കവർ ചെയ്ത്....
ലാസ്റ്റ് തൃശ്ശൂർ ഒല്ലൂർ മാലാഖയുടെ കൂട് തുറക്കലും കഴിഞ്ഞ്.....
സംഗതികൾക്കൊക്കെ സുല്ലിട്ട് വീണ്ടും സ്കൂളിലേക്ക് മടങ്ങാം 😁
പറഞ്ഞു വരുമ്പോൾ.... ഒരോ ഒക്ടോബറിനും ഓരോ നിറവും മണവും വികാരവും.🍁
ഇവിടെ, കാനഡയിലേക്ക് കുറ്റിയും കോലും പറിച്ച് ചേക്കേറിയതിൽപ്പിന്നെ പഠിച്ച കാര്യങ്ങൾ ഒരുപാടാണ്...
ഉദാഹരണത്തിന്....
മഞ്ഞുമൂടിക്കിടക്കുന്ന ഇടവഴിയിൽ ഡോണാൾഡ് ഡക്ക് നടക്കുന്നപോലെ എങ്ങനെ വീഴാതെ നടക്കാം....
മൈനസ് ഇരുപതിൽ എങ്ങനെ സൈഡ് വലിവില്ലാതെ ചിരിക്കാം....
ബാങ്ക് ബാലൻസ് നോക്കിയിട്ട് കിളിയഞ്ചും പറന്നാലും എങ്ങനെ ഒന്നും സംഭവിക്കാത്തതുപോലെ ചായ കുടിക്കാം....
അങ്ങനെ അങ്ങനെ ജീവിതം പഠിപ്പിച്ച കോഴ്സുകളിലൊന്നാണ്.......
ഇവിടത്തെ ഒക്ടോബർ ആഘോഷങ്ങളിലെ മൂപ്പൻ
Thanksgiving! 🍁
യെസ്,
യു ഹേർഡ് ഇറ്റ് റൈറ്റ് മിസ്റ്റർ പെരേര!!!
നന്ദിയുള്ളവരായിരിക്കാൻ പ്രത്യേകം ഒരു ദിവസം!
ആരോട്?
എന്തിന്?
എങ്ങനെ?
അങ്ങനെ ചോദിച്ചാൽ കുറച്ച് ഫ്ളാഷ് ബാക്കിലോട്ട് പോകേണ്ടിവരും.
1578-ൽ കാനഡയിലെത്തിയ Martin Frobisher എന്ന ഇംഗ്ലീഷ് പര്യവേക്ഷകൻ തന്റെ യാത്ര സുരക്ഷിതമായി പൂർത്തിയാക്കിയതിന് ദൈവത്തോട് നന്ദി പറഞ്ഞ് ഒരു ചടങ്ങ് നടത്തിയതായി പൊതുവെ പറയപ്പെടുന്നു.
പിന്നീട് വിളവെടുപ്പിനോടനുബന്ധിച്ചുള്ള ആഘോഷങ്ങളും നന്ദിപ്രകടനങ്ങളും വളർന്ന് ഈ പരുവത്തിൽ എത്തിയെന്നാണ് ചരിത്രം.
ഡബ്ലു ഡബ്ലു എഫിലെ മലർത്തിയടിവീരൻ തടിയനെപ്പോലെ നല്ല മസിലുള്ള ടർക്കി കോഴിയെ നിർത്തിപ്പൊരിച്ചത്...... ഈ ആഘോഷങ്ങളിൽ സായിപ്പിന്റെ ഫേവറൈറ്റ് ആണ്!
കൂടെ മാഷ്ഡ് പൊട്ടാറ്റോയും, രക്തവർണ്ണത്തിലുള്ള.... ലേശം പുളിയുള്ള ക്രാൻബെറി സോസും...
മൊത്തത്തിലുള്ള ഈ പെർമ്യൂട്ടേഷൻസ് ആൻഡ് കോമ്പിനേഷൻസ്.... സാധാ മലയാളി നാവിന്റെ രസമുകുളങ്ങൾക്ക് എത്രത്തോളം താല്പര്യപ്പെടുമെന്ന് അറിയില്ലെങ്കിലും.....
ഈ ആഘോഷത്തിന് അതിമനോഹരമായി മാറ്റുകൂട്ടുന്ന ഒന്നുണ്ട്.
നന്ദി പറയുക. ❤️
എല്ലാം നമ്മൾ ആഗ്രഹിച്ചതുപോലെ നടന്നതുകൊണ്ടല്ല. ജീവിതത്തിൽ എല്ലാം തികഞ്ഞതുകൊണ്ടുമല്ല.
കിട്ടിയ കാര്യങ്ങൾക്കും കിട്ടാഞ്ഞവയ്ക്കും.....
കൂടെയുള്ളവരുടെ കൂട്ടിനും, അകന്നുപോയവർ സമ്മാനിച്ച മനോഹര നിമിഷങ്ങൾക്കും....
നടന്ന സ്വപ്നങ്ങൾക്കും, നടക്കാതെ ബാക്കിയായവയ്ക്കും...
അതായത് രമണാ.....
പറഞ്ഞു വന്നത് ന്താച്ചാൽ......
മനസ്സിൽ കൂടെയുള്ള സ്നേഹങ്ങളോട് അവർ നമുക്ക് എത്ര പ്രധാനപ്പെട്ടവരാണെന്ന് ഒരു നാണവുമില്ലാതെ പറയാൻ വൈകിക്കേണ്ട.
കാരണം ചില കാര്യങ്ങൾ പറയാനും... തിരുത്തേണ്ടത് തിരുത്താനും നമുക്കും അവർക്കും ഇനിയും ഒരുപാട് സമയമുണ്ടെന്ന് നമ്മൾ വെറുതെ കരുതും.
ആ ഉറപ്പാണ് ജീവിതത്തിലെ ഏറ്റവും വലിയ തമാശകളിലൊന്ന്.
പഴയതിൽ നിന്ന് പഠിച്ച പാഠങ്ങളുമായി, നന്ദിയോടെ മുന്നോട്ട് നടക്കാനും പുതിയ തുടക്കങ്ങളെ വിനയത്തോടെ വരവേൽക്കാനും...
Move ahead with gratitude!
Wishing you a happy and blessed Thanksgiving! 🍁❤️
